အနုပညာ ဈာန်
>>> လူတော်တော်များများက ကိုယ့်ကို အလှအပ ပန်းချီကားများကို ရေးဖွဲ့တဲ့လူလို့ထင်နေကြတယ်။
အလှအပ ပန်းချီကားများကို ရေးဖွဲ့တဲ့နေရာမှာလည်း ဒီနေ့ကိုယ်ဟာ အောင်မြင်နေတဲ့ လူတစ်ယောက် ဖြစ်နေတော့ သူတို့ထင်မယ်ဆိုလည်း ထင်စရာကြီးဖြစ်နေတော့တာပေါ့။
တကယ်တော့ ကိုယ်ဟာ သူတို့ထင်သလို မဟုတ်ပါဘူး။ ကိုယ်ဟာ ခံစားမှုသမားပါ။ ဗီဇဓာတ်ခံကိုက စိတ်လှုပ်ရှားတတ်တဲ့ အမျိုးအစားထဲကပါ။
အလှအပကို အတတ်ပညာနဲ့ရေးဖွဲ့ရတဲ့ ကားမျိုးကို ပြုလုပ်တဲ့အခါမှာ ကိုယ့်စိတ်ကို အတော်ကြီး ဖိတ်ခေါ် ဈာန်သွင်းရပါတယ်။
ရိုးရိုးထိုင်ပြီး ဈာန်သွင်းလို့မှ မရရင် လမ်းဆုံလမ်းမတွေပေါ်မှာ လျှောက်သွားရင်း ဈာန်သွင်းရပါတယ်။
ဒီလိုမှ မရသေးရင် ရုပ်ရှင်တွေဝင်ကြည့်လိုက်၊ စာအုပ်အသစ်အဟောင်းဆိုင်တွေ လျောက်လှန်လိုက်နဲ့ ဈာန်သွင်းရပါတယ်။
ဒီလိုမှ မရပြန်သေးရင်ဖြင့် တစ်ခါတစ်ရံ ကိုယ်လိုသူလို အမျိုးတူပန်းချီဆရာများထံသွားပြီး သူတို့ရေးဆွဲနေတာကိုကြည့်ပြီး ကိုယ့်စိတ်ကို အားကျလာအောင် မနည်းကြီးမှ ဈာန်ဝင်အောင် လုပ်ယူခဲ့ရပါတယ်။
အဲဒီလို မရအရ ဖန်တီးနေရတဲ့အခါမျိုးမှာ တချို့လူတွေက ကိုယ်တို့ကို လုပ်စရာတွေကို မလုပ်ဘဲ အချိန်ဖြုန်းနေတဲ့လူတွေလို့ မြင်တတ်ထင်တတ်ကြပါသေးတယ်။
တချို့များမနေနိုင်လို့ ပါးစပ်ကတောင်ဖွင့်ပြီး မေးလာကြတယ်။ “ဘာလုပ်နေတာလဲ” လို့။ ဒီတော့ ကိုယ်တို့က “စဉ်းစားနေတာပါဗျာ” လို့ဖြေလိုက်ရင် သူတို့က ရယ်ကြတယ်။
အဲလို အခါမျိုးမှာဆို ကိုယ်သိပ်စိတ်ဆိုးချင်တာဘဲ။ ဒါပေမယ့် မဆိုးရဲဘူး။ နောက်မှ ဆိုးမယ်လို့သာ တေးထားလိုက်ရတယ်။ ဘာလို့လဲဆိုတော့ တစ်ဝက်တစ်ပျက် ဝင်စားနေတဲ့ ဈာန်ကလေး ပြန်လျှောသွားမှာ စိုးလို့ပါဘဲ။
ကိုယ်တို့ခေါင်းထဲမှာ စစ်ပွဲကြီးတစ်ပွဲလို ကိုယ့်စိတ်နဲ့ ကိုယ့်ကိုယ်တိုက်နေရတဲ့ အဖြစ်ကိုတော့ သူတို့မမြင်နိုင်စွမ်းကြဘူးပေါ့။ <<<
* ပေါ်ဦးသက် *
========================================
( အနုပညာ အကြောင်း ကိုယ့်အကြောင်း ၊ ၁ ၊ ပေါ်ဦးသက် ) POT စာအုပ် မှ တစ်စိတ်တစ်ပိုင်း ကောက်နှုတ်မျှဝေပါသည်။
ဆရာကြီးမှ သူ တကယ် လုပ်ချင်တဲ့ တကယ်လည်း လုပ်နိုင်တဲ့ ခံစားမှုပါတဲ့ ပန်းချီကားတွေ အပြင် အလှအပတည်ဆောက်မှု ပန်းချီကားမျိုးကို အကြောင်းကြောင်းကြောင့် ရေးဖြစ်ခဲ့တဲ့အကြောင်း၊ ဘယ်လို ခွန်အားစိတ်ထုတ်ပြီး ဈာန်သွင်းခဲ့ရသည့်အကြောင်း ပြောပြခဲ့တဲ့ စိတ်ဝင်စားစရာ အကြောင်းအရာလေးပါ။