မျက်ရည်နှစ်ပွင့်
သိပ်သတိရစွာ စာရေးလိုက်ပါတယ်
ကိုယ်နေမကောင်းဘူး ဝမ်းနည်းမိတယ်
အနားမှာ မင်းရှိနေရင် သိပ်ကောင်းမှာ
ပြတင်းဝက အပြင်ကို ငေးမိတော့
မြစ်ဟာ သက်ရှိလို စီးဆင်းသွားတယ်
ငါတို့လည်း ကမ်းပါးနဲ့မြစ်လို
နောက်ဆုတ်လို့ မရတော့တဲ့ အနေအထားထဲ
ပြောင်းလဲဝေးကွာမှု ဝေဒနာနဲ့
ခရီးပြင်းနှင်ဆဲ မဟုတ်လား
သစ်ပင်တွေကြီးလာပြီး
တို့မျှော်လင့်ချက်တွေ သေးငယ်သွားစေတဲ့ အချိန်ကာလ
နေဝင်ရိုးရီဟာ
လွမ်းဖွယ် လှပခဲ့ပုံများ
နှုတ်ခမ်းနီတွေ တအားမဆိုးပါနဲ့
ကိုယ့်အကြောင်းတွေ တွေးပြီး မဆွေးပါနဲ့
ပတ်ဝန်းကျင်နဲ့ အဆင်မပြေရင်
ပန်းကလေးတွေနဲ့ နေထိုင်ပါ
သီချင်းလေးတွေကြည့်ရင်း အပန်းဖြေပါ
ကိုယ်တို့ဘဝတစ်စုံကြား
ရွာတဲ့မိုးက သည်းခဲ့တယ်
ဝေတဲ့နှင်းက မြဲခဲ့တယ်
ဒါကြောင့်ပဲ သိပ်သတိရမိတယ်
ဒါကြောင့်ပဲ ဒီစာရေးမိတယ်
ဒါကြောင့်ပဲ ဒီစာပို့မိတယ်
မင်းဖတ်ရမယ့် နေ့ရက်ထဲ
ဒီစာရွက်ပေါ်
မျက်ရည်နှစ်စက် ဆုံကြမယ် ……။ ။
ဝိုင်ချို
Artist Paw Oo Thet - Sailing the Irrawaddy